සිංහල ජාතියේ අති උත්කර්ෂවත් මහා මංගල්‍යයක් වන සුර්යයා මීන රාශියේ සිට මේෂ රාශියට පැමිණීමෙන් උදාවන අලුත් අවුරුද්ද ග්‍රහ මණ්ඩලයේ ප්‍රධානතම ග්‍රහයා වන රවි මුල්කර සිදුවන ක්‍රියාදාමයකි. මෙය ජ්‍යොතිෂය මත පදනම් කරගෙන සිදුවන මහා මංගල්‍යයකි. සුර්ය ග්‍රහ මණ්ඩලයේ අධිපති ප්‍රධාන රජුවන රවි ග්‍රහයා 2012.04.13 දින මේෂ රාශියට පිවිසෙන ලදි. ජ්‍යොතිෂය අනුව රවි ග්‍රහයා රත් පැහැ ඇස් ඇති රන් ඔටුන්නක් හිස දරාගත් සුදු අශ්වයෙක් පිට නැගි රාජ කුමාරයෙකි.
රවි ග්‍රහයා මේෂ රාශිය වූ පළමුවන රාශි මණ්ඩලයෙන් ආරම්භ වන ගෝචර ගමනෙන් රටට ජාතියට සතුට සැපත වාසනාව සෞභාග්‍යය උදාවන්නේ යයි ප්‍රාර්ථනා කරන අතරම මේෂ රාශියේදි රවි, සඳු, කුජ, බුධ, ගුරු, සිකුරු, සෙනසුරු යන ඒ ඒ ග්‍රහයින් ජන්ම කේන්දරයේ දුබලව, පාපව, පීඩිතව පිහිටීමෙන් නොයෙක් අසනීප රෝගී තත්වයන් ඇතිවීම වැලක්විය නොහැක. ජන්මියෙකුගේ නිරෝගීභාවය පිලිබඳව ප්‍රධාන වශයෙන් රවි, සඳු යන ග්‍රහ දෙදෙනා විශාල වගකීමක් ඉටුකරයි. ඒ අතර කේන්දරයේ 06 වැන්නත්, 06 වැන්නේ පිහිටි ග්‍රහයින් සහ 06 වැන්නාධිපති පිහිටි ආකාරය අනුවත් රෝග කාරකයන් දැනගැනීම පහසුවෙයි.
ස්ත්‍රි කේන්දරයකදී රවි දුබලවීමට වඩා සඳු දුබලවීම අතිශයින්ම පීඩාකාරි දෙනු ඇත. මේෂ රාශිය දුබලවීමෙන් හිස මුල් කරගෙන සියළුම රෝගි තත්වයන්ද, සැපවත් නින්දට බාධාවෙන් නින්ද නොයෑම, ඇස්වල පෙනීමේ දුර්වලතාවයන්ද, දත්වල ආබාධයන්ද, ස්නායු නහර වේදනාවන්ද සමගින් මොළයට ලේ ගමන් කිරීමේ බාධාවෙන් ඇතිවන නොයෙක් රෝගී තත්වයන්ද, වකුගඩු වල ක්‍රියාකාරිත්වයේ ඇනහිටීම පමණක් නොව හිසේ තට්ටය පෑදීම, අකලට හිසකෙස් පැසීමද, උෂ්ණ දැවිලි රෝග, මොළයේ අසනීප, හදිසි ක්ලාන්තය, සිහි නැතිවීම, උෂ්ණාධියෙන් හටලන්නා සරම්ප, පැපොල් වැනි බෝවන රෝගයන්ද ඇති කිරීමට ඉඩ ඇති කරවයි. තවද හිසෙහි මෙන්ම මුහුණෙන් ද ලපකැළල් ඇති කරවා විරූපී තත්වයන්ටද ඉඩ ඇති කරවයි. එසේම පුහු අහංකාරත්වය, අධික කෝපය, පහත් අදහස් ඇතිවීම, අනුන් නොසැලකා හැරීම, ආත්මාර්ථකාමී අදහස්ද ඇතිකරවනු ඇත. විශේෂයෙන් අනියම් මරණ සහ සියදිවි අහිමිය ආදිය පිලිබඳව සැලකිලිමත් විය යුතුයි.
මේෂ රාශියේ දී රවි ග්‍රහයා දුබල වීමෙන් දැඩි ලෙස සිරුරේ උෂ්ණ රෝග ඇතිකරවයි. හිසේ සහ ඇස්වල ආබාධ ඇතිකරවයි. අධික කෝපය හේතුවෙන් ස්නායු අමාරුවද, පපුවේ අමාරුව ඇති කරනු ඇත. දකුණු පසෙහි ඇතිවන රෝගාබාධයන් බහුල කරනු ඇති අතර පුරුෂයන්ගේ දකුණු ඇසටද ස්ත්‍රීන්ගේ වම් ඇසටද පීඩා කරත්. හදිසි කෝපාකාරවු කතාව නිසා නැති කරදරද, සිහිමුලාවීමද ඇතිකර ගනියි.
මේෂ රාශියේ දි සඳු ග්‍රහයා දුබලවීමෙන් සිත දූෂිතවීමෙන් ඇති වෙන්නාවු රෝගයන්ද, පපුවේ සෙම, පපුවේ ඇදුම, උගුරේ සෙම, සෙම් ගෙඩි සහ සෙම ගලන රෝගයන්ද, උදර රෝග, පාචනය, නොයෙක් පණු රෝග, ක්ෂ්‍ය රෝග, පෙනහල්ලේ නොයෙක් ආබාධයන් ඇති කිරීමට සමත් වෙයි. අපස්මාරය, කුඩා දරුවන්ට වලිප්පුව, සන්නි රෝග, විවිධාකාරවු උමතු රෝගයන්ද, ඇගපත වෙව්ලීම, සිරුරේ අප්‍රාණික ගතිය, දණහිසේ වේදනාව, රාත්‍රියෙහි වැඩ කිරීමෙන් සහ අධික නිදි මැරීමෙන් නින්දට බාදා පමුණුවා ගැනීමෙන් ඇතිවෙන්නාවු රෝගයන්ද, ඉවසීම අඩුකම සහ අධික කල්පනාව හේතුවෙන්ද දියවැඩියාව වැනි කල්ගතවන අසනීප රෝගයන් ලඟ කර ගනියි.
මේෂ රාශියේ දී කුජ ග්‍රහයා දුබලවීමෙන් හදිසි අනතුරු අත වනයි. යමෙකුගේ මරණය කෙරෙහි ද කුජ විශේෂයෙන් බලපානු ඇත. දරුණු උෂ්ණ රෝග, ලේ දුෂ්‍යවීමෙන් ඇතිවන රෝගාබාධයන් ද, ශරීරයේ මිදුළු ඇට කෙරෙහි ද බලපාන අතර කෝළහාලයන්, අඩදබර, ලේ ගැලීම්, සිහි මද ගති හෝ සිහිවිකල් ගති, රහස් ප්‍රදේශ අවයවයන්, විසකුරු සත්වයන්ගෙන් ඇතිවන්නාවු විපත්, කරදර, හිසේ දරුණු වේදනාව, ඇස්වල සෙම හේතුවෙන් ඇතිවන රෝග බඩවැල්වල ආබාධ, ඉදිමුව, සිහියේ දුබලතා, අධික නිදිමැරීමෙන් ඇතිවෙන දුබලතා, හිසේ මුහුණේ ලප කැළල්, කැපුම් කෙටුම් සහ දීර්ඝකාළීනව විවේක ගතයුතු නොයෙක් රෝගයන්ද ඇති කරවයි.
මේෂ රාශියේ දී බුධ ග්‍රහයා දුබලවීමෙන් හිසෙහි ඇතිවන සාමාන්‍ය අසනීපයන්ද, හිරිවැටීම්ද, කොන්දේ අමාරුව සහ ස්ත්‍රින්ගේ ගර්භාෂයේ නොයෙක් ආසාදන, සැපවත් නින්දට බාධාවද පවතින අතර අසනීප කරදර ගැන සිතීමෙන් හෝ හදිසි බියවීම්, තැතිගැන්වීම්, අධික සිත් කණගාටු වේදනාවන් නිසා ස්නායු නහර පද්ධතියේ ක්‍රියාකාරිත්වයට බාධාවන් ඇතිවෙයි. තවද ක්ලාන්තය, හිසරදය, උමතු රෝගයන්ද, කතාවේ බල දුබලතාවයන්ද, සිහිබුද්ධියේ දුබලතාවයන්ද, කන් ඇසීමේ අඩුව, හිසෙහි බර ගතිය, සමාජයෙන් අපවාදයට ද අසුවීමේ ඉඩකඩ ද පවතියි.
මේෂ රාශියේදි ගුරු ග්‍රහයා දුබලවීමෙන් ශරීරයේ මේද ධාතුවට බලපාන ග්‍රහයා වන්නේ ද ගුරුයි. හිසේ ආබාධ, උගුරේ නොයෙක් ආසාදනයන්, උගුර ඉදිමුව, හිසේ සියුම් නහරවල ලේ ගමනයට බාධා තෙරපීම, සිහිනෙන් බියවීම, මනුෂ්‍ය උපද්‍රව, හිසේ වේදනා, ක්ලාන්තය, සෙම අධික වීම හේතුවෙන් සිරුර පමණ ඉක්මවා මහත්වීම, පෙනහල්ලේ අසනීප, විදුරු මස් දියවීම, දිය පිනස, සෙංගමාලය, රක්තවාතය, දියවැඩියාව වැනි කල් අල්ලන අසනීප, විවිධ කුෂ්ඨ රෝගයන්ට බලපාන ලබයි.
මේෂ රාශියේදි සිකුරු ග්‍රහයා දුබල වීමෙන් හිසෙහි තෙත ගතිය වැඩි වීමෙන් සෑදෙන රෝග, ශරීරයේ අප්‍රාණික ගති, වකුගඩු සහ තුනටියේ අමාරු, පපුවේ සෙම හේතුවෙන් සෙම් ගෙඩිද, දියවැඩියාව, සිරුර අධික ලෙස මහත්වීමටද, සිකුරු බලපානු ඇත. මුත්‍රා අමාරු, බෙල්ල මහත්වීම වැනි ආසාදන ඇති කරවයි.
මේෂ රාශියේ සෙනසුරු ග්‍රහයා දුබලවීමෙන් මොළය සීතල වීමෙන් ඇතිවන රෝග බාධාවන්, සෙම් කෝප, ආමාශගත හිරවීම, කන් බිහිරි වීම, දත් කැක්කුම, පීනස් අමාරු, ඕජස් උගුරට ගැලීමේ අමාරුවද, හිසට හදිසි අනතුරුදායක පීඩාවන්, පහරවල් ලැබීම්ද, දණහිස් අමාරු, දෙපා වේදනා, කකුලේ කැක්කුම ආදි රෝගයන් පෙන්වයි.
රාහු ග්‍රහයා මානසික රෝග පිළිබඳව දැඩි ලෙස බලපාන අතර කේතු ග්‍රහයා සම දූෂිත වීම් පිලිබඳවද, ජන්මියා එක්තැන් කරවන අංශභාග වැනි රෝගයන්ද, නැවත ඒව අතුරුදහන්වීම වැනි දෙයද පෙන්වනු ඇත.
Comments
Post a Comment