ඔබේ සෙනසුරු මාරුවයි ඔබේ ග්‍රහචාරයයි වාසනාවයි

2011 නොවැම්බර් මස 15 දින සෙනසුරු තුලා රාශියට මාරුවිය. නමුත් 2012 පෙබරවාරි මස 07 දින සෙනසුරු කන්‍යාවට වක්‍රව පැමිණ නැවත 2012 අගෝස්තු 04 වන දින තුලා රාශියට පැමිණියද ඔක්තෝබර් 15 දින සිට සෙනසුරු තම බලය තුලා රාශියේ පතුරුවනු ඇත. 2014 නොවැම්බර් මස 02 දක්වා සෙනසුරු තුලා රාශියේ සිටියි.

මේෂ, වෘෂභ, කටක, සිංහ, තුලා, ධනු, මකර, කුම්භ හිමියන්ට මෙම සෙනසුරු මාරුව සුබපල දෙනු ඇත.

මිථුන, කන්‍යා ලග්නකරුවන්ට මිශ්‍ර පල දෙනු ඇත.

වෘශ්චික, මීන ලග්නකරුවන්ට සුබපල හීන කරනු ඇත.

මූල, පුවසල, උත්‍රසල යන නැකත් වලින් උපන්නන්ට පීඩාකාරී බව තදින් නොදැනුනද, වෙහෙස දැනෙනු ඇත.

මේෂ ලග්නයට   සුබයි

සෙනසුරු 07වැන්නට යයි. සුබපල දෙන වෙනස්කම් රාශියක් ඇති වෙයි. විවාහයේ සහ ඥාති සබඳතා අතර පැවැතුන මතභේද ගැටුම් සමථයට පත්වෙනු ඇත. ස්වයං රැකියා, ව්‍යාපාර දියුණුවට පත්වෙයි. බොහෝ වෙනස්කම් ආර්ථිකය වෙනුවෙන් සිදුවෙනු ඇත. පමා වූ වැඩ කටයුතු අවසන් කිරීමට වාසනාව හිමි වෙයි.

වෘෂභ ලග්නයට  සුබයි

සෙනසුරු 06වැන්නට යයි. පැහැදිලි වෙනසක් මෙම කාලයේදී සිදුවෙනු ඇත. හතුරෝ පරාදවෙත්. රැකියා, ස්වයං රැකියා උසස් තත්වයට හා ව්‍යාපාර දියුණුවට කාලයකි. ධනය හිමිවන කාලයකි. ආදරය, විවාහයට සුබයි. වගකීම් දැරීමට සිදුවන අතර පැවැති අසනීප දුරුවෙනු ඇත. සැපෙන් විනෝදයෙන් කාලය ගත කිරිමට හැකි කාලයකි.

මිථුන ලග්නයට  අසුබයි

සෙනසුරු 05වැන්නට යයි. සුබපල මිශ්‍රයි. අනුන් සමග ඇති ව තිබූ ගිවිසුම් පොරොන්දු වෙනස්කම් ඇතිවෙයි. ඉක්මන්කම, හිතුවක්කාරි ගතිය නිසා වැඩ අවුල් වෙයි. නිෂ්ඵල ගමන් වැඩිවෙයි. අවසානයක් දකින්නට තිබූ කරදර ප්‍රශ්න නැවත හිස ඔසවනු ඇත. තම තත්වය පහත වැටෙයි. හීනමානයයි. උදරාබාධ රෝග වැඩිවෙයි. දුරදක්නා නුවණුන් සිහිබුද්දියෙන් වැඩ කලයුතු කාලයකි.

රවි, සඳු, මීන රාශියේ නම් සෙනසුරු අපලය වැඩියි.

කටක ලග්නයට  සුබයි

සෙනසුරු 04වැන්නට පිවිසෙයි. මෙම මාරුව පැහැදිලි සුබපල දෙනු ඇත. නිවාස, ඉඩම්, දේපල, භූමිය සම්බන්ධයෙන් පැවැති කරදර පහව යනු ඇත. නිරවුල් වෙයි. රැකියා, ව්‍යපාර කටයුතු දියුණුවෙයි. මුදල් කරදර අවසන් වෙයි. අඟහිඟ නැතිව යයි. රැකියාවේ පහසු ස්ථාන මාරුවීම් සහිතයි. උසස්වීම හිමියි.

සිංහ ලග්නයට    සුබයි

සෙනසුරු 03වැන්නට යයි. සුබයි. කරගෙන ආ වැඩ කටයුතු නැවතත් ආරම්භ කිරීමට සිදුවෙනු ඇත. ඒවා දියුණුවට පත්වෙනු ඇත. දේපල, ඉඩම් භූමි වාසනාවයි. තම අයිතිය තහවුරු වෙනු ඇත. රැකියා උසස්වීමයි. තනතුරු හිමිවෙන කාලයයි. නව මිතු සබඳතා ඇතිවෙයි. සුබපල දෙන කාලයකි.

කන්‍යා ලග්නයට අසුබයි

සෙනසුරු 02වැන්නට පිවිසෙනු ඇත. අනුන් සමග කරන ගනුදෙනු, ව්‍යාපාර, පොරොන්දු, ගිවිසුම් කරදරකාරී සහ වංචාවන්ට තුඩු දෙන නිසා කල්පනාවෙන් වැඩ කලයුතුයි. නැත්නම් එමගින් විවිධ කරදර ඇතිවෙනු ඇත. මුදල් නාස්තිවෙන ගමන් වැඩිවෙනු ඇත. පලක් නැති ගමන් ඇතිවෙයි. වැඩකට නැති, පලක් නැති අයගේ උපදෙස් අනතුරු සහිතයි. රැවටිලි වංචාකරුවන්ගෙන් ප්‍රවේශම් විය යුතුයි. විරුද්ධ ලිංග ඇසුර ප්‍රශ්න, කරදර, පීඩා ඇති කරනු ඇත. පවුලේ අවුල් වියවුල් වැඩිවෙනු ඇත. රවි, සඳු, මීන රාශියේ නම් කරදර එමටයි.

තුලා ලග්නයට   සුබයි

සෙනසුරු මාරුව ලග්නයටයි. පැහැදිලි සුබ වෙනසක් හිමි කාලයයි. නැවතී තිබූ වැඩ ආරම්භ වෙනු ඇත. උත්සාහයට ප්‍රතිපල හිමි කාලයයි. ආදායම ඉහලයයි. අත ගසන කටයුතු සාර්ථකයි. දුරදක්නා නුවණින් වැඩ කලොත් දිනුම අත ලඟයි.

වෘශ්චික ලග්නයට           අසුබයි

සෙනසුරු 12වැන්නට යයි. අසුබ කාලයයි. අසනීප, ධනහානි, කරන කියන වැඩට බාධා, අවහිර, කරදර කාලයයි.

ධනු ලග්නයට    සුබයි

සෙනසුරු මාරුව 11ටයි. ගතට සිතට සැනසුමයි. තම හිතුමතයට කරන වැඩ සාර්ථක වන කාලයයි. රැකියා තනතුරු නිලතල උසස්වීමයි. ව්‍යාපාර දියුණුවෙයි. මුදල්, වාසි ලබයි. දේශපාලන වැඩ දියුණුවෙයි. නාමය ප්‍රසිද්ධවෙයි.

මකර ලග්නයට  සුබයි

සෙනසුරු 10වැන්නට පිවිසෙනු ඇත. උත්සාහයේ තරමට ප්‍රතිපල හිමියි. සිත් තැවුල්, වේදනා, කරදර, නැතිව යනු ඇත. නව රැකියා, ව්‍යාපාර සුබයි. විපත්, කරදර දුරුවෙනු ඇත.

කුම්භ ලග්නයට  සුබයි

සෙනසුරු මාරුව 09වැන්නටයි. හතුරු කරදර, විපත්, කරදර පහව යනු ඇත. සිතේ සතුට වැඩිවෙයි. කරන කියන වැඩට ඇති බාධා ඉවත්වෙනු ඇත. පිනට දහමට සිත යයි. සිතේ සතුට පවති. සමාජයේ පිලිගැනීමට ලක්වෙනු ඇත. ධන වාසි, ඉඩම්, ලාභ හිමි කාලයයි.

මීන ලග්නයට    අසුබයි

සෙනසුරු 08වැන්නට යනු ඇත. සිත් පීඩා, කලකිරීම බහුල කාලයයි. අනතුරු සහිතයි. ශාරිරීක පීඩා, අසනීප, සිත් තැවුල් වැඩිවෙයි. නිකරුනේ ගමන් වැඩියි. නොකල වැරදි, බොරු චෝදනා ඇති වෙයි. මිළ, මුදල් නිකරුනේ වැය වෙනු ඇත. හදිසි විපත් අනතුරු ආබාධ කාලයයි.

මුල, පුවසල, උත්‍රසල පීඩා අඩුයි.

පුවපුටුප, උත්‍රපුටුප, රේවතී යේ උපත ලබා මාර්තු 15ත් අප්‍රේල් 15ත් අතර කාලයේ උපත ලබා ඇත්නම් බාධා, කරදර මරන කාලයයි.